Laiti Jouni S. - Arctic Indigenous Design Archives (AIDA)
Jouni Laiti, govvejeaddji Kevin J. Francett / Kajastus Creative.

Laiti Jouni S.

Duojár ja oahpaheaddji


Jovnna S. Laiti lea eret Mierašjávrris Ohcejohleagis, muhto orru dán áigái Anáris, gos sus lea bádji. Son lea bargan stuorra oasi eallimis bohccuiguin ja eará luondduealáhusaiguin. Jovnna lea bargan duojárin jagi 1994 rájes. 

Duojit ledje guovddášoassin Jovnna mánnávuođaruovttu árggas. Su eadni goarui nuvttohiid ja eará árbevirolaš gárvvuid bohcconáhkis. Nuvttohiid son goarui valjis maiddái vuovdimassii. Áhčči duddjui reagaid ja fatnasiid iežas ja bearraša atnui. 

Son lea čađahan duoji bachelordutkosa jagis 2011 ja duoji masterdutkosa jagis 2019 Sámi allaskuvllas Guovdageainnus. Dan lassin son lea čađahan oahpaheaddji pedagogalaš oahpuid. Jovnna lea bargan Sámi oahpahusguovddážis duodjeoahpaheaddjin jagi 2011 rájes ja bargan doppe maiddái garraduodjeoahpahusa ovddidanbarggu. Son lea doaimmahan davvisámegielat girjji Garraduodji jagis 2018. Jovnna doaimmai AIDA-fitnu bagadanjoavkkus AIDA I -prošeavtta áigge. 

Duoji masteroahpuid oktavuođas son lea bargagoahtán eanet dáidagiin. Iežas dáidagis Jovnna ovdanbuktá árbevirolaš dujiid ja ođđaáigásaš čoarve-, dákte- ja báhkkedujiid. Su duojit leat leamašan oaidnimis ee. Sámemusea Siiddas, Mänttä govvadáiddavahkuin, Pariissa Suoma instituhtas ja Sámi dáiddaguovddážis Kárášjogas. Jovnna njealje barggu ollisvuohta lea Riikkagalleriija Kiasmas. Dáid lassin Jovnna lea lágidan čuovgagovvačájáhusa Ohcejogas.


Sámmol Jon Jovnna arkiiva sisttisdoallá su masterdutkamuša, čájáhuslogaldallamiid sihke áviisačuhpposiid. Áviisačuhpposat muitalit Jovnna bargobálgá lassin dan birra, mo duodji gieđahallo medias.