Katarina Spik Skum - Arctic Indigenous Design Archives (AIDA)

Katarina Spik Skum

(r.1971)

Duojár

 


Katarina Spik Skum la riegádam 1971 ja årru fuolkijnis Jåhkåmåhken (Jokkmokk). Mánnárájes la viessum duodjárij siegen ja nuorran iesj duodjuhatjáj. Duodjuj ienemusát ateljean viessomsajen.

Katarina Spik Skum la tjadádam bachelor- ja mastereksámav duojen/giehtabargon Sámi allaskuvlan (Samisk högskola) 2015. Dajna eksámajn la akta guovtet ulmutjis Svierigin alep åhpadusájn Duojen. Eksámabargon Goahten (Såsom i kåtan) la installasjåvnnå ja teorehtalasj barggo. Eksámabargon ságastallá goadev ja viessomsajev mujttosadjen valla aj sadje sáme viessogárvvidibmáj. Vádtsám la aj sassne- ja tekstijllalinjan Sámij Åhpadusguovdátjin (Samernas Utbildningscentrum). Sujna l aj åhpadiddjeeksáma ja l låhkåm nuorttasámegielav, julevsámegielav ja sáme histårjåv.

Katarina Spik Skum juo nuorran låhtågådij julevsáme vuoddagijt. Dat rájes la vuoddagijt låhtåm valla aj gårrum gábdijt ja gárvvobiehkijt fuolkkáj ja berrahijda ja vuobddemij. Sujna l vijdesbirástiddje máhttudahka árbbedábálasj julevsáme duojen valla tjanos la aj gejda bádtjiji ja ådåstuhtti julevsáme duojev. Vuohke l ávkkit ådå tujgajt ja bájnojt valla vuododum la árbbedábálasj máhttudagán.
Katarina Spik Skum la vuosedam ietjas masterbargov moatten sajen Sámeednamin ja l oassálasstám tjoahkkáldakvuosádusájn ietjádij siegen Jåhkåmåhken ja Ubbmemin. Samiska Minnesfondenis oattjoj stipendav 2019.


Arkijvan li ienemusát ábnnasa Bachelor- ja masteråhpadusás Duojen bv. akademak eksámatjállusa, gåvåstagá, vuosáduskataloga, affisja ja tidnikbeskudisá ja ábnasbiehke ja dávvera praktijkalasj bargos. Arkijvan la vil duodjebiejvvegirjje ienep gå 550 dávverijn, vuottabiehke, gåvå ja ietjá dokumentasjåvnnå.

[AJTTE]