Helge Sunna - Arctic Indigenous Design Archives (AIDA)

Helge Sunna

(r.1940) 

Duojár


Helge Sunna lea riegádan jagis 1940 Leavas čearus Gironis. Son lea šaddan veagas mas leamaš máŋga bures sajáiduvvon duojára ja duoji ođasmahtti. Otne orru son eamidiinnis Inggain (r. Pejok) Sollentunas, doppe biilalanjas sus lea duddjonlatnja.

Son lea sihke dáiddadahkki, čálli, ođđajurddašeaddji, guorahalli ja Sámi vuođđudusa Sámi Duoji gohččuma mielde duoji árvvoštalli. Bargat duojárin, nugo Helge Sunna, mearkkaša ahte fertet bargat máŋggaid surggiiguin. Helge Sunnai dát lea buktán mielddis sihke dáiddalaš buvttadeami ja ođđa jurddašeami ja dasa lassin beassat bargat duoji ovdánahttináššiiguin. Helge Sunna lea iežas govahallan dáiddaduojárin, ii dáiddárin. Su barggu vuođđu leat árbejuvvon vierut, son geavaha árbevirolaš ávdnasiid ja bargovugiid, muhto son lasiha ođđaáigásaš jurdagiid ja osiid su buktagiidda. Dan oaidná earret eará dalle go son lea ráhkadan meavrresgári, muhto maiddái go son lea hábmen bolluid ja niibbiid. Sutnje lea duddjon ”váimmu ášši”, juoga maid duddjo váimmuin, ”gieđa čehppodagain, váimmu láđisvuođain čalmmi illun”. Helge Sunna bargá sámepolitihkarin ja jođiha kultuvrralaš áššiid. Earret eará lea son ráhkadan njuolggadusaid ja rávvagiid gesällreivve váras. Dat lea dohkkehuvvon Ruoŧa Hantverksrådas. Dát bargu addui sutnje Sámi duodjevuođđudusas Sámi Duojis ja  Sámij åhpadusguovdásjis. Son lea čállán girjji Duodji, árbi, handicraft in the Sámi culture, girji almmuhuvvui Sámi Duojis jagi 2006.

Oktan eamidiinnis Inga Sunnain soai leaba nammaduvvon Jahkečuođi Meašttirduojárin, leai searvi Svensk Hemslöjd guhte dagai dan, ákkastallamis daddjo ahte soai leaba riika čeahpimus duojára mat oktiiheiveba goabbat guoimmis ovdanbuktimiid ja joatkiba ráhkadit kompromissakeahtes duoji mii doallá máŋggaid buolvvaid.


Helge Sunna vuorkkás leat arkiivadávvirat nugo sárgumat, giehtačállosat ja teavsttat. Dasa lassin leat doppe govat duojis ja dáiddaduojis ja ávnnasbihtážat. Vuorkkás leat maiddái ávdnasat duodjeguorahallamiin, prošeavttat maid son lea vuolggahan, jođihan dahje oasálastán, ja maiddái girjjit maidda son lea čállán teavsttaid.

[AJTTE]