Anna-Stina Svakko - Arctic Indigenous Design Archives (AIDA)

Anna-Stina Svakko

(r.1967)

Duojár


Anna-Stina Svakko riegádii jagis 1967 ja su orohat ja bargobáiki lea Bårjåsis, šattadettiin son lea maiddái orrun Málages. Eatnis bokte, Edit Svakko, lea duodji álo leamaš oassi Anna-Stina eallimis. Juo nuorran son diđii ahte son háliidii eallit duojis ja dujiin.
Anna-Stina Svakko oahpai goarrut joatkkaskuvllas ja jagis 1984 son jotkkii Sámij åhpadusguovdásjis. Oktasaš davviriikkalaš oahpahusas son válddi meašttirreivve duojis jagis 1991. Sus maiddái lea pedagogalaš oahpahus. Dan son lea čađahan Sámij åhpadusguovdásja ja Sámi allaskuvla bokte. Dasa lassin lea son vázzán Dáiddaskuvllas Sunderbyas jagiin 2003- 2006. Jagis 2003 son álggahii Astu Deisign.

Anna-Stina Svakko bargguin lea duodji vuođus muhto áiggi mielde lea son ovddidan fitnodaga mas leat máŋggalágán diŋgonbarggut. Son lea leamaš oahpaheaddji muhton ásahusain, doallan gáktegoarrungurssiid ja logaldallamiid. Máŋgga láhkái lea son bargan dáiddalaš ovdabuktimiiguin. Jagi 1992 rájis son lea ordnen čájáhusaid Sámis ja čájehan su bargguid, main leat konseptuála oasit, catwalkain. Svakko estetihka vuođđu lea oaččuhit ”wow- jienaid” gullot dalle go son sirddaša rájiid. Hámiid giella lea seammás árbevirolaš ja kontroversiealla. Son geavaha dábálaš ávdnasiid, muhto maiddái designerláđđiid ja álo son lasihastá ođđa osiid su bargguide.


Oktavuođadieđut

Ruovttusidu: www.astudesign.com
Facebook: Astu Design
Instagram: @astu.design

Svakko vuorkkás lea valljodat. Das leat oasážat mat govahallet máŋggaid su kreatiivvalaš hámiid gielaid. Vuorkkás leat duojit nugo gávttit, burssat, čiŋat ja govat, báccit, sárgumat, vuorkádávvirat nugo gursaávdnasat, giehtačállosat logaldallamiidda, sárgumat bivttasosiide, sárgumat diŋgojumiide ja čájáhusaide. Čálusvuorká, affischat ja ávdnasat čájáhusain ja oalle ollu govat.

[AJTTE]