Marit Susanna Eira - Arctic Indigenous Design Archives (AIDA)

Marit Susanna Eira

Duoji ja hábmema studeanttat

Migál Elle Iŋggá Máret Susánná dahje Marit Susanna Eira lea Guovdageainnus eret. Son bargá oahpaheaddjin Sámi joatkkaskuvla ja Boazodoalloskuvllas. Son lea studeantan Sámi allaskuvllas ja váldá bachelorgráda duojis ja hábmemis. Son lea válljen duodjeoahpu go lea bajásšaddan duojárbearrašis ja ieš duddjon mánnávuođa rájes. Go galggai lassioahpu váldit, de lei lunddolaš duojárbálgá čuovvulit. 
Sutnje lea dehálaš árbevieruid doalahit, muhto maiddái ovdánahttit ja ođasmahttit duoji, vai sámi duodji ain eallá.

Lihkkobaste

Duodji ja digitála muitalusat oahpus studeanttat ožžo bargobihtá, man fáddán lei "Johtin". Máret Susanna vuosttáš johtin lei go fárrii mánnávuođa ruovttus ođđa ruktui. Eatnamis dan viesu olggobealde gávnnai boares čoarvebastte, mii sutnje šattai mávssolaš muitun dán johtimii. Dán fáttás de duddjui soagis čoarvebastte sullasaš muorrabastte, maid lea gohčodan Lihkkobasten. Bagadalli Jøgge Sundqvist oahpahii movt ákšuin ja niibbiin duddjo. Bastte hearvvain lea mearkkašupmi. Bajimusas lea guđa lasttat lieđđi, mii mearkkaša lihkku. Golmmačiegagat hábmejit njeallje S-bustáva. Máret Susanna bearrašis lea Susanna namma árbejuvvon buolvvas bulvii. Golmmačiegagat govvidit ráhkisvuođa. Dán basttes lea dát ráhkisvuohta gaskkal eatni ja máná. Basttii leat guokte silbarieggá heŋgejuvvon. Silba lea šiella, mii suodjala ulddaid vuostá. 

Boagánboalut



Máret Susanna lea loge jahkásažžan oahppan čuoldit ja maŋŋil oahppan maiddái dávlet. Go lei oanehaš dávlen, de tevdnii ieš dávleminstara. Girjin bijai dábálaš sámi hearvvaid, maid gohčodit “Ovllá” ja “dikkel”.

Dán barggus tevdnii boagánboaluid, main leat iežas dávleminstara girjjit. Boaluid vuođđu lea čoarvvis, ja girjjit leat silbbas. Son ráhkadii maiddái boagángeaži čoarvvis, mas lea silba guovddáš. Dát boagánboalut čájehit movt son lea ovdánan duojárin. Álggos lea oahppan árbevirolaš čuoldima, dasto ráhkadan ieš dávleminstara ja dál ráhkadan čoarve- ja silbaboaluid dávleminstara vuođul.