Monica Blind-Påve - Arctic Indigenous Design Archives (AIDA)

Monica Blind-Påve

Duoji ja hábmema studeanta

Niillasa Lásse Monica dahje Monica Blind-Påve lea eret Badje Sohpparis Ruoŧabealde Sámis. Son lea bajásšaddan boazodoalobearrašis Sárevuomi čearus, gos duodji lea leamašan guovddáš doaibma árgabeaivvi eallimis. Son lea giitevaš oahpus ja dieđus maid lea oahppan váhnemiinnis Ánte Juhána Ánne Márjjás ja Niillasa Lásses. Monica lea joatkán duddjot ja ođasmahttit duoji árbevirolaš sámi ávdnasiiguin. Rávisolmmožin Monica lea váldán iešguđetge oahpuid duojis, gos lea bargan ávdnasiiguin, nugo muorain ja čorvviin, silbbain ja guolgaávdnasiiguin, sistiin ja diŋga ávnasiiguin.


Duojit, mat dán siiddus oidnojit, lea son duddjon dalle go lei duodjestudeantan Sámi allaskuvllas. Doppe son lei fárus oahpus Duodji ja digitála muitalusat, mii lea oassin AIDA I -prošeavttas. Duodje ja digitála muitalusat oahpus ledje bargobihtát, main ledje dihto fáttát, nugo “Johtin” ja “Mun lean”.

Veskkoš

Duodji mas lei fáddán “Johtin” lea unna veskkoš. Veaskku hápmi boahtá sabetčimas, dahje fatnasa skohttásis, dahje geresčimas, dahje sarvva bealjis. Veasku lea mátketelefuvnna guoddima várás jođidettiin, ja lea ráhkaduvvon ruovttudikšojuvvon sasttis ja ruksesmiessadagas. Veasku lea ráhkaduvvon siste- ja miessadatbázahusaiguin, maid son lea čohkken ja vurkkodan áiggi mielde. Veaskonjálbmi lea hervejuvvon čorvviin.

Avvi

Duodji mas fáddán lei “Mun lean” vuolgá árbevirolaš nisson avis Gárasavvon guovllus, gosa Monicas lea gullevašvuohta. Boagán lea hervejuvvon sasttiin, láđđiin ja silbaboaluin, main lea čoarvi. Boahkána ivnnit spiehkastit árbevirolaš nisson boahkánis, mii dábálaččat lea rukses ja fiskes ivnnis.